Син на индиски милијардер нуди засолниште за нилските коњи на Ескобар

Стадото нилски коњи поврзано со нарко-босот Пабло Ескобар, обележано за колење во Колумбија, доби нов дом во Индија по предлог на Анант Амбани, син на милијардерот Мукеш Амбани.

Помладиот Амбани ја повика колумбиската Влада да ја преиспита својата одлука за еутанизација на 80 нилски коњи и понуди „целосно обезбедени, безбедни и научно водени преместки“ од Вантара центарот за диви животни основан од него во Џамнагар во индиската сојузна држава Гуџарат. 

Ескобар, убиен во 1993 година, нелегално увезувал егзотични диви животни за својата приватна зоолошка градина, вклучувајќи и четири нилски коњи. По неговата смрт, тие се ослободиле во сливот на реката Магдалена, множејќи се во инвазивна популација која сега се проценува на над 200 единки. Интервенциите како што е кастрацијата не успеаја да го контролираат нивниот раст. Следствено, Министерството за животна средина на Колумбија вели дека усмртувањето е потребно за да се заштити екосистемот на земјата.

Амбани, сепак, смета дека животните „не избрале каде се родени, ниту ги создале околностите со коишто сега се соочуваат“ и повика на хумано решение. Објектот Вантара, со површина од 3.500 хектари, се тврди, е еден од најголемите центри за вдомување и зачувување на дивиот свет во светот, во којшто се сместени над 2.000 видови. Тука има и ветеринарен центар за слонови и центри за размножување на загрозени видови. Не е отворен за јавноста, но бил домаќин на познати гости како што се Лионел Меси, Иванка Трамп и Ријана, кои го посетиле за време на свадбените прослави на Амбани.

Заштитници на дивиот свет предупредуваат дека преместувањето на нилските коњи може да биде непрактично поради високите трошоци и законските пречки.

Засолништето во Џамнагар се соочи со критики поради брзото стекнување егзотични животни и наводните прекршувања на законите за трговија со диви животни. Врховниот суд на Индија формираше панел за истрага на обвинувањата и установата беше ослободена од обвинение во ноември 2025 година.