На црквата „Свети Јаков“ во Линколншир потребни ѝ се околу 117.000 евра за итна реставрација

На црквата „Свети Јаков“ во селото Драј Додингтон во англискиот регион Мидлендс, чијшто камбанарија е наклонета повеќе од познатата Коса кула во Пиза, ѝ се потребни повеќе од 117.000 евра за поправка на сериозно оштетениот и искривен под.

Црквата, која има статус на заштитен објект од втора категорија и потекнува од 12 век, е позната по својот камбанариски столб, кој е навален околу 5,1 степен. За споредба, навалувањето на Кулата во Пиза изнесува околу 3,97 степени.

Според информациите од локалните власти и црковниот одбор, објектот веќе подолго време бил во ризична состојба поради структурни оштетувања на камената конструкција и проблеми со стабилноста. Во претходниот период биле изведени реставраторски интервенции, кои чинеле околу 100.000 евра, но и покрај тоа проблемите не биле целосно решени. Како резултат на пропаѓање на дрвениот под и поместување на камените плочи во внатрешноста на црквата, се појавиле дополнителни оштетувања, што придонело за обемни и итни градежни зафати.

Според црковниот чувар Ричард Лојнс, целта на локалната заедница е да се соберат средства за целосна замена на стариот под, санација на внатрешните ѕидови, како и подобрување на електричната инсталација во објектот, кој во моментов располага со само еден функционален електричен приклучок.

Црквата првично била изградена како помошна капела наменета за постари жители од селото, а подоцна прераснала во парохиска црква. Камбанаријата, според историските податоци, потекнува од 14 век и се смета дека нејзиното навалување започнало кон крајот на 19 или почетокот на 20 век. Локалниот црковен одбор наведува дека самата локација на објектот, низ вековите била изложена на силни временски услови, што значително придонело за постепено пропаѓање на црквата. Црковните претставници предупредуваат дека состојбата на подот е премногу загрижувачка, со сериозни оштетувања, поради што итната реконструкција се смета за неопходна за зачувување на стабилноста и безбедноста на објектот.