Кошта предупредува дека Русија е единствениот победник од војната на Блискиот Исток

Русија засега е единствениот победник од војната на Блискиот Исток бидејќи цените на енергијата растат, а вниманието посветено на војната против Украина се намалува, изјави денеска претседателот на Европскиот совет, Антонио Кошта, повикувајќи на дипломатско решение на конфликтот.

„Засега, има само еден победник во оваа војна – Русија“, рече Кошта во говорот пред амбасадорите на ЕУ во Брисел.

„Русија добива нови ресурси за финансирање на својата војна против Украина додека цените на енергијата растат. Таа има корист од пренасочувањето на воените капацитети што инаку би можеле да бидат испратени за поддршка на Украина. Таа, исто така, има корист од намаленото внимание кон украинскиот фронт, бидејќи конфликтот на Блискиот Исток е во центарот на вниманието.“

Кошта ја нагласи потребата ЕУ да го заштити меѓународниот поредок базиран на правила, за кој рече дека сега е доведен во прашање од САД, и ги повика сите страни на Блискиот Исток да се вратат на преговарачката маса.

„Европската Унија стои покрај страдалниот народ на Иран. Ние го поддржуваме нивното право да живеат во мир и да ја одредат својата иднина“, рече тој, повикувајќи на заштита на цивилите и нуклеарна безбедност.

„Слободата и човековите права не можат да се постигнат со бомби. Само меѓународното право ги поддржува“, додавајќи дека мора да се избегне понатамошна ескалација. “Таквиот пат им се заканува на Блискиот Исток, Европа и пошироко“, заклучи Кошта.