Бил и Хилари Клинтон одбија да сведочат за Епстин во Конгресот

Бил и Хилари Клинтон одбија да сведочат во конгресната истрага за покојниот финансиер и осуден сексуален престапник Џефри Епштајн, водена од републиканците, оценувајќи дека станува збор за партиски мотивирана постапка.

Во писмо до републиканскиот претставник Џејмс Комер, претседател на Комитетот за надзор на Претставничкиот дом, тие напишаа дека „секој човек мора да одлучи кога е доста“, и додадоа дека за нив „тој момент дојде сега“.

Можни последици од одбивањето да сведочат
Комер се закани дека ќе ги прогласи Клинтонови за виновни за непочитување на Конгресот доколку не се појават пред комитетот, што потенцијално ќе доведе до кривични обвиненија.

Во писмото што Хилари Клинтон го сподели на социјалните медиуми, Клинтонови рекоа дека се обиделе да ги обезбедат „малкуте информации“ што ги имале за да помогнат во истрагата и го обвинија Комер за одвлекување на вниманието од неуспесите на администрацијата на Трамп.

„Го направивме ова затоа што злосторствата на Епштајн беа ужасни. Ако владата не направи сè што можеше за да ги истражи и гони овие злосторства, од која било причина, тоа треба да биде фокусот на вашата работа… Нема докази дека го правите тоа“, напишаа тие.

„Нема веродостојно објаснување за она што го правите освен партиска политика“, рекоа тие, додавајќи дека очекуваат Комер да му наложи на одборот да ги прогласи за виновни за непочитување на судот.

Администрацијата на претседателот Доналд Трамп, под притисок од политичката база на Трамп, му нареди на Министерството за правда да објави досиеја поврзани со кривичните истраги против Епштајн, кој некогаш бил пријател со Трамп и Клинтонови, сè во согласност со законот за транспарентност донесен од Конгресот.