Поранешната финска премиерка Сана Марин го осудува сексизмот во своите мемоари

Во своите мемоари објавени денеска, поранешната финска премиерка Сана Марин го осудува сексизмот што го претрпеле жените во нејзината влада за време на нејзиниот мандат и се жали на „постојаниот прилив на онлајн закани“.

Во 2019 година, 34-годишната Марин стана најмладата жена избрана за премиерка во светот. Таа предводеше централно-левичарска влада составена од пет партии, сите предводени од пет жени. Четири од нив беа под 35 години.

За само неколку месеци, поранешната финска премиерка стана една од најпознатите политички фигури на планетата, наречена „рок-ѕвезда премиерка“ од медиумите.

Во својата автобиографска книга „Надеж во акција. Храброста да се води“, Сана Марин верува дека нејзината возраст и пол биле од големо значење во начинот на кој таа и нејзината влада биле третирани. Таа го осудува онлајн вознемирувањето на кое биле изложени членовите на нејзиниот кабинет. Марин вели дека жените кои ги воделе партиите што го сочинувале нејзиниот кабинет биле „мета на постојан прилив на онлајн закани, претежно од сексуална природа“. Самата Марин вели дека толку многу пати ѝ се заканувале со силување и други форми на сексуално насилство што изгубила број.

„Нашата компетентност и лидерски вештини постојано беа доведувани во прашање, без никаков обид да се потврдат овие обвинувања“, додава поранешната премиерка.

Иако беше многу популарна за време на нејзиниот мандат, Сана Марин брзо го подели финското општество поради медиумските скандали поврзани со нејзиниот личен живот. Во август 2022 година, видеа од неа како се забавува со фински познати личности се појавија на социјалните мрежи, што стана водечка вест во медиумите ширум светот. Под притисок, таа потоа се подложи на тест за дрога за да се отстрани секое сомневање за несоодветно однесување за време на забавата.

Марин смета дека е изненадувачки да се праша дали би постапила поинаку ако однапред знаела каква врева ќе предизвикаат видеата. „Каков живот би бил тоа?“, прашува таа.

Кратко по поразот на социјалдемократите на изборите во април 2023 година, Сана Марин го објави своето повлекување од политиката и беше назначена за стратешки советник во Институтот за глобални промени, предводен од поранешниот британски премиер Тони Блер.