Барселона ниту следниот натпревар нема да го игра на „Камп Ноу“

Третиот натпревар што Барселона ќе го играа оваа сезона во Лигата на шампиони, на 21 октомври против Олимпијакос, сепак, нема да се игра на „Камп Ноу“, туку на „Естадио Олимпико де Монжуик“, како што беше случај и со вчерашниот натпревар против ПСЖ.
„Клубот продолжува да работи на добивање на потребните административни дозволи за повторно отворање на „Камп Ноу“ во наредните денови“, се вели во соопштението на Барселона.
Повеќе од две години откако започнаа работите за реновирање со кои се зголеми неговиот капацитет на 105.000, легендарниот стадион „Камп Ноу“ сè уште не е подготвен за домашни натпревари, вклучувајќи го и натпреварот од Лигата на шампионите против грчкиот тим.
Најавени беа неколку датуми за повторно отворање – почетокот на 2025 година, потоа пролет, август, па дури и септември – но, според Градскиот совет на Барселона, стадионот сè уште не е во можност безбедно да ги смести гледачите, дури и со намален капацитет.
Портпаролот на каталонската противпожарна служба изјави дека се детектирани неколку безбедносни недостатоци, особено на излезите за итни случаи.