Земјите членки на ЕУ блиску до консензус за ИБАР за Албанија

Земјите членки на ЕУ се блиску до постигнување консензус за нацрт-заедничкиот став на ЕУ поврзан со привремениот извештај за процена на референтните вредности на Албанија (ИБАР) – објави „Јуропиен Вестерн Балканс“ (European Western Balkans) повикувајќи се на извори во Советот, а пренесоа албанските медиуми.

Дискусиите во рамките на работната група на Советот за проширување и земји што преговараат за пристапување кон ЕУ (КОЕЛА) сè уште се во тек и сè уште не е постигнат формален конечен договор.

Сепак, според извори на ЕВБ (EWB), земјите членки се блиску до компромис. Во споредба со ситуацијата на почетокот на април, кога временската рамка за овој чекор беше нејасна, забележлив е напредок меѓу членките на ЕУ.

Доколку се постигне консензус на ниво на КОЕЛА, следниот процедурален чекор би бил одобрување на нацрт-заедничкиот став на ЕУ на состанокот на Комитетот на постојаните претставници (КОРЕПЕР), закажан за 22 мај, наведуваат медиумите.

Прашањето би можело да се усвои како таканаречена точка И (точка I), што значи дека амбасадорите на земјите членки би го одобриле без дискусија.

Доколку КОРЕПЕР го одобри заедничкиот став на ЕУ, тоа би го отворило патот за одржување меѓувладина конференција со Албанија во наредните денови.

ИБАР (IBAR) претставува процена на Европската комисија за тоа дали се исполнети привремените критериуми според кластерот 1 – Основи. Овој кластер опфаќа области како што се владеењето на правото, судството, основните права, демократските институции и реформата на јавната администрација. Позитивен ИБАР би овозможил процесот да се движи напред кон конечно затворање на сите преговарачки поглавја.

Албанија не може да продолжи понатаму без позитивен ИБАР. Таа формално ги отвори преговорите за пристапување со Европската Унија во јули 2022 година. Кластерот 1 – Основи беше отворен во 2024 година, а дополнителни кластери беа отворени во текот на 2025 година, со што земјата влезе во фаза фокусирана на исполнување на привремените критериуми и унапредување на преговорите.