По зголемувањето на даноците, во Британија дневно се затвораат околу два паба

Околу два паба во Велика Британија се затворале секој ден во првите три месеци од годинава поради притисокот од повисоките даноци и регулаторните трошоци, според бројките од индустријата.

По новата даночна политика од минатата година, на почетокот од оваа, 2026 година, Владата на Велика Британија објави поддршка за деловните стапки за пабовите по предупредувањата дека натамошните даночни промени би можеле да доведат до повеќе затворања и губење на работни места. Британската асоцијација за пиво и пабови (ББПА) предупреди дека затворањата се еквивалентни на губење на околу 2.400 работни места, со удар врз помладите работници. Олеснувањето од 15 отсто за пабовите и музичките места стапи во сила минатиот месец. Британската влада, притоа, нагласи дека ги поддржува британските пабови.

– Ги намалуваме сметките за деловни даноци во април за 15 отсто, проследено со двегодишно замрзнување, го продолжуваме работното време на Светското првенство и го зголемуваме Фондот за поддршка на угостителството на 10 милиони фунти за да им помогнеме на местата во раст. Подоцна оваа година, ќе ја градиме и нашата програма „Гордоста на прво место (Pride in Place)“ со нашата нова Стратегија за главните улици за да ги ревитализираме нашите градски центри. Ова доаѓа покрај ограничувањето на данокот на добивка, намалувањето на данокот на алкохол на точените пива и шест намалувања на каматните стапки, што им користи на бизнисите во секој дел од Британија, изјави владиниот портпарол.

Сепак, мерките од минатиот ноември, како што е и зголемувањето на минималната плата, сепак доведоа до значителен скок на деловните трошоци за пабовите и пиварите, објави „Бордер телеграф (Border Telegraph)“.

Според ББПА, најновите бројки на затворени угостителски објекти (161 паб во три месеци) ја истакнуваат потребата од долгорочни промени и поширока ревизија на даноците во угостителскиот сектор, истакна Ема Меккларкин, извршна директорка на здружението.

– Обемот на овие затворања може да се избегне бидејќи пабовите вршат брза трговија, но нивните профити се уништени од непропорционално даночно оптоварување и огромни трошоци. За многумина, самата тежина на даноците и регулаторните трошоци ги принуди да затворат, што само ќе им наштети на заедниците, работниците и пошироката економија. Ова посочува зошто олеснувањето на деловните стапки од страна на Владата беше толку неопходно, а поддршката толку добредојдено олеснување, нагласи Меккларкин.

И Британската алијанса за пијалаци, којашто претставува стотици дестилерии од цела земја, ја повика Владата да спроведе „соодветна ревизија“ на акцизата бидејќи угостителството „се бори за гол живот“.

Велс е единствениот дел од Велика Британија што пријави зголемување на бројот пабови, според најновите податоци, додека Шкотска бележи најголем пад. Во Лондон, на пр., има 17 затворени пабови од 3.432 објекта. Во Велс, има три повеќе – вкупно 2.901 паб, а во Шкотска е забележан 41 затворен паб на 4.188 коишто работат.