Маск се нагоди со Комисијата за хартии од вредност, ќе плати 1,5 милиони долари

Американскиот милијардер Илон Маск постигна спогодба со американската Комисија за хартии од вредност (SEC) во граѓанската тужба во врска со доцнењето на објавувањето на неговиот сопственички удел во компанијата Твитер во 2022 година, соопшти федералниот суд во Вашингтон.

Според договорот, фонд во име на Маск ќе плати казна од 1,5 милиони долари, без признавање на вината, додека милијардерот нема да мора да ја надомести наводната добивка остварена поради одложеното објавување на информациите.

SEC во тужбата од јануари 2025 година наведе дека 11-дневното доцнење на Маск во откривањето на својот почетен удел од 5 отсто во Твитер на крајот на март и почетокот на април 2022 година му овозможило да купи акции вредни повеќе од 500 милиони долари по вештачки ниски цени.

Маск претходно негираше каква било намера да ги прекрши правилата, наведувајќи дека доцнењето било ненамерно, додека постапката на регулаторот ја оцени како спорна бидејќи претставува кршење на неговото право на слобода на говор.

Случајот е дел од подолгата историја на правни спорови меѓу Маск и SEC, почнувајќи од септември 2018 година, кога регулаторот го обвини за измама со хартии од вредност бидејќи на Твитер изјави дека „обезбедил“ финансирање за потенцијално приватизирање на неговата компанија за електрични автомобили Тесла (TSLA.O). Тој случај беше решен со плаќање на граѓанска казна од 20 милиони долари, дозвола адвокатите на Тесла однапред да прегледуваат некои објави на Твитер и негово повлекување од функцијата претседател на таа компанија.

Комисијата за хартии од вредност (SEC) го тужеше Маск шест дена пред поранешниот американски претседател Џо Бајден да ја напушти Белата куќа, а на негово место да дојде Доналд Трамп. Сегашниот претседател на SEC, Пол Аткинс, ги пренасочува приоритетите на регулаторот во спроведувањето на законот.