МААЕ вели дека нападот со дрон оштетил опрема во нуклеарната централа Запорожје

Меѓународната агенција за атомска енергија (МААЕ) синоќа соопшти дека напад со дронови оштетил опрема за следење на времето во нуклеарната централа Запорожје, која е под руска контрола, во југоисточна Украина.

Нуклеарната централа Запорожје, најголемата во Европа со шест реактори, беше заземена од руските сили во првите недели по целосната инвазија на Украина во февруари 2022 година. Оттогаш, секоја страна редовно ја обвинува другата за воени дејствија што би можеле да ја загрозат безбедноста на електраната, која се наоѓа во близина на фронтовската линија.

Во објава на социјалната мрежа „Х“, МААЕ соопшти дека нејзините експерти ја посетиле Лабораторијата за следење на надворешното зрачење во електраната, еден ден откако руските претставници изјавија дека била погодена од беспилотно летало.

„Тимот ја испитал штетата на дел од опремата за метеоролошко набљудување, која сега е неупотреблива“, се вели во соопштението на МААЕ.

Во соопштението се додава дека генералниот директор на МААЕ, Рафаел Гроси, повторно повикал на „максимална воена воздржаност во близина на сите нуклеарни објекти за да се избегнат какви било безбедносни ризици“.

Електраната, која моментално не произведува електрична енергија, неколку пати е погодена од дронови откако започна конфликтот.

Управата на нуклеарната централа Запорожје во неделата соопшти дека штетата е мала и дека другите активности не се засегнати.

Еден од надворешните далноводи на централата, кој се користи за ладење на нуклеарно гориво, е надвор од употреба од крајот на март, а минатата недела МААЕ соопшти дека се обидува да организира локален прекин на огнот за да го поправи.

Гроси ја посетил нуклеарната централа Запорожје неколку пати откако паднала под руска контрола, а МААЕ испратила постојани набљудувачи во неа, како и во три други оперативни украински нуклеарни централи.