Австралија продава напредна радарска технологија на Канада, договор е вреден 1,7 милијарди долари

Австралија денеска соопшти дека ќе продаде напредна радарска технологија способна за откривање ракети со долг дострел на Канада во договор вреден 2,5 милијарди австралиски долари (1,75 милијарди американски долари), што е најголемиот договор за извоз во одбраната во историјата на земјата.

Договорот е првата меѓународна продажба на Австралија на радарот „Over-the-Horizon”, кој ќе ѝ помогне на Канада да го набљудува Арктичкиот регион.

„Денешниот договор е значајна пресвртница во одбранбената трговија на Австралија и ги поставува основите за подлабока и заемно корисна соработка со Канада“, рече премиерот Ентони Албанезе.

Арктичкиот регион на Канада сочинува околу 40 проценти од копнената површина на земјата, иако е ретко населен и има ограничена инфраструктура. Голем дел од руската арктичка територија – околу една петтина од нејзината површина – се наоѓа спроти Канада и американската држава Алјаска.

„Канада ја зајакнува безбедноста на Арктикот преку овој проект. Овој проект е дел од поширок напор за изградба на интегрирана мрежа за надзор и комуникација во Арктикот што ќе ја подобри способноста на Канада да следи, разбира и реагира на активностите во регионот“, рече Стивен Фур, државен секретар на Канада за набавки во одбраната.

Австралиската оперативна радарска мрежа „Jindalee Operational Radar Network“ може да детектира и следи авиони, бродови и ракети на дострел до 3.000 километри. Според Австралија, договорот за споделување технологија со Канада ќе создаде околу 300 работни места во земјата и е прва фаза од пошироката соработка меѓу двете земји за радарски системи.