Филмски измами: Автомобилите не не’ штитат од куршуми

Во акционите филмови често се создава впечаток дека автомобилите претставуваат некаква импровизирана оклопна заштита од куршуми. Ликовите се кријат зад вратите на возилата, додека куршумите драматично удираат во лимот, по што изгледа како ситуацијата да е под контрола. Меѓутоа, станува збор за широко распространет, но опасен мит.

Балистичките тестирања за отпорност покажуваат дека вратите на стандардните патнички возила се изработени од релативно тенок челик и алуминиумски панели. Нивната примарна функција е намалување на тежината на возилото, подобрување на енергетската ефикасност и обезбедување заштита при сообраќајни удари со ниска и средна брзина, а не запирање на проектили од огнено оружје.

Резултатите од испитувањата спроведени од безбедносни агенции во САД укажуваат дека поголемиот дел од сериски произведените автомобили не обезбедуваат никаква сигурна заштита од огнено оружје. Според податоците на Националниот институт за правда (National Institute of Justice), стандардните патнички возила не се класифицираат како заштитни балистички бариери. Дури и куршуми од пиштол со калибар 9 мм, кои често се сметаат за помалку моќни, од кратка оддалеченост можат без пречки да ги пробијат вратите на автомобилот.

Форензичките истражувања дополнително потврдуваат дека проектилот по пробивање на металниот лим на возилото задржува доволно кинетичка енергија за да биде смртоносен и во внатрешноста на кабината.

Автомобилските стакла, иако се дизајнирани да се распрснат на ситни и релативно побезбедни делчиња при удар, не нудат заштита од куршумите. При погодок од тие моментално се кршат и не ја запираат траекторијата на проектилот.

Во филмската продукција често се прикажуваат сцени во кои ликовите се засолнуваат зад возилото. Моторот, поради својата голема маса и густина на металните компоненти, може да запре одредени проектили. Сепак, ова не е сигурна заштита, бидејќи ефектот зависи од повеќе фактори, меѓу кои аголот на погодок, типот на муниција, брзината, калибарот и конкретната точка на ударот. При тоа, моторот на автомобилот не претставува балистички штит, туку само структурно погуст дел од возилото кој во одредени околности може да апсорбира дел од енергијата на проектилот.

Безбедносните експерти и балистичките инженери се согласуваат дека сериските патнички автомобили не се дизајнирани за заштита од огнено оружје. Нивната конструкција е оптимизирана за удобност, економичност, еколошки стандарди и безбедност во сообраќајот, а не за вооружени инциденти.

-Филмската индустрија со текот на времето создаде силна и често погрешна илузија дека возилото може да послужи како сигурен штит. Во реални ситуации, ваквото верување може да доведе до погрешни одлуки, бидејќи автомобилот не обезбедува балистичка сигурност, советуваат експертите.