Драган Великиќ добитник на наградата „Прозарт 2026“

Српскиот писател Драган Великиќ, двократен добитник на НИН-овата награда и еден од најпреведуваните современи автори од регионот, е годинашен лауреат на наградата „Прозарт“, што ја доделува Интернационалниот литературен фестивал „ПРО-ЗА Балкан“.

Наградата му се доделува за авторски придонес во развојот на книжевноста на Балканот, а ќе му биде врачена на затворањето на 14. издание на фестивалот на 15 септември во Музејот на град Скопје.

Во образложението, Одборот за доделување на наградата наведува дека творештвото на Великиќ се одликува со стилска префинетост, длабок интерес за внатрешниот свет на ликовите и внимателно следење на политичките, социјалните и културните промени во регионот.

Великиќ е автор на дванаесет романи, три збирки раскази и повеќе книги есеи и интервјуа. Добитник е на НИН-овата награда за романите „Руски прозорец“ и „Иследник“, а меѓу неговите меѓународни признанија се и Наградата на градот Будимпешта за литература и книжевната награда „Виленица“.

На годинашниот фестивал „ПРО-ЗА Балкан“ ќе учествуваат и албанската писателка Дијана Чули, бугарскиот писател Николај Терзијски, словенечката авторка Габриела Бабник Уатара, ирско-британскиот автор и продуцент Мајк Дауни, српската писателка Христина Радовиќ Андриќ, грчката авторка Зиновија Василејади и македонскиот писател Блаже Миневски.

Организатор на фестивалот е издавачката куќа „Прозарт медиа“ од Скопје