Заврши сагата „Лајвли – Балдони“: Глумицата доби само 400.000 долари за правни трошоци

Судот во САД вчера ѝ додели на Блејк Лајвли нешто повеќе од 400.000 американски долари за адвокатски трошоци во нејзиниот спор со колегата-глумец и режисер од „Ова завршува со нас“ (It Ends With Us), Џастин Балдони – многу помалку од над осумте милиони долари што таа ги бараше.

Лајвли и Балдони ја решија својата 18-месечна правна битка во мај, избегнувајќи федерално судење коешто беше закажано за подоцна истиот месец. Во тоа време, единствен нерешен случај беше барањето на Лајвли за адвокатски трошоци за тоа што мораше да се брани од тужбата за клевета на Балдони. Судијата Луис Лиман вчера ѝ додели 407.000 американски долари (скоро 350.000 евра), т.е. 363.000 долари за адвокатски трошоци и 44.000 долари за судски трошоци. Во својата пресуда, Судот утврди дека Лајвли има право само на „разумни“ трошоци поврзани со одбраната од тужбата за клевета.

Претходно, Лајвли побара 7,5 милиони долари за адвокатски трошоци и уште 540.000 долари за судски трошоци.

Лајвли поднесе жалба до Калифорнискиот оддел за граѓански права во декември 2024 година, тврдејќи дека Балдони и „Вејфарер студиос“ (Wayfarer Studios) почнале кампања на интернет за клевета против неа како одмазда за поднесување жалби за сексуално вознемирување на снимањето на филмот „Ова завршува со нас“. Балдони возврати со тужба за клевета, обвинувајќи ги Лајвли и нејзиниот сопруг, Рајан Рејнолдс, за лажни обвинувања како дел од обидот да ја преземат креативната контрола врз филмот. Тој, исто така, го тужеше „Тајмс“ за објавување сторија во голема мера заснована на тужбата за граѓански права. Таа тужба беше отфрлена врз основа на тоа што тврдењата на Лајвли беа заштитени со привилегија за судски спор, а написите во весникот се прописно известување за постапката.

Лајвли побара надомест според Законот за обесхрабрување на непотребни тужби за клевета против тужителите кои излегуваат со обвинувања за сексуален напад. Лајвли првично побара и тројна отштета и казнена отштета, но Лиман претходно пресуди дека тоа во случајов не е можно според федералните закони.