Специјална награда за претставата „Кокошка“ на фестивалот „Kolyada Plays“ во Русија

Претставата „Кокошка“, во продукција на независниот театар Вортекс и копродукција со НУ Театар Комедија, ја освои Специјалната награда од Kolyada Theatre од стручното жири, составено од истакнати театарски уметници, на XIX Меѓународен фестивал на современа драматургија „Kolyada Plays 2026“ („Драмите на Кољада“), кој се одржа во Екатеринбург, Русија.

Со ова признание претставата ја доби препознатливата фестивалска награда „Метална комета“, во конкуренција на 28 театарски продукции.

„Кокошка“ е работена по текст на драмскиот автор Николај Кољада, во режија на Теодора Силјаноска. Во претставата настапуваат Биљана Драгиќевиќ-Пројковска, Ане Блажовски, Ванеса Тримчевска, Томе Станковски и Кристина Гиева. Костимограф е Марија Пупучевска, соработник за сценско движење Дарко Велиќ, изборот на сценографијата и музиката е на Теодора Силјаноска, а дизајнот на плакатот го изработи Михаил Велески.

-Претставата го истражува копнежот по слобода, љубов и соништа во свет што станува сè постуден и поапатичен. Низ апсурд, импровизација и секојдневни ситуации, ликовите создаваат жив театарски чин како обид да се соочат со внатрешниот хаос и нарушените општествени вредности.„Кокошка“ е приказна за младоста – немирна, искрена и гладна за промени, која се судира со стравот, рамнодушноста и затворените системи. Како џез-импровизатори, ликовите играат против непредвидливото, барајќи простор за надеж, слобода и човечност, соопшти Независниот театар „Вортекс’, кој е  посветен на современата изведувачка уметност, интердисциплинарната соработка и општествено ангажираниот театар.

Оттаму посочуваат дека „Kolyada Plays“ е еден од најзначајните и највлијателни театарски фестивали во Русија и пошироко во Источна Европа.

-Основан е во 2008 година од рускиот драмски автор, режисер и педагог Николај Кољада, една од клучните фигури на современата руска драматургија. Неговите текстови се поставувани на сцени низ Европа, а фестивалот со години претставува важна платформа за нова драматургија, авторски театар и меѓународна размена на современи сценски практики, се наведува во соопштението.

Од следната театарска сезона претставата „Кокошка“ ќе биде изведувана на малата сцена на Театар Комедија.