Францускиот суд ја потврди забраната на Марин Ле Пен да учествува на избори

Француската крајнодесничарска политичарка Марин Ле Пен не успеа во обидот да ја поништи одлуката да биде исклучена од избори.

Државниот совет (Conseil d’État), највисокиот управен суд во Франција, ја одби жалбата на пратеничката и лидерка на партијата Национален собир. Судиите изјавија дека прописите што се во прашање можат да се изменат единствено со промена на законот.

Суд претходно во април ја осуди Ле Пен за злоупотреба на средства од Европската унија. Најконтроверзниот дел од пресудата е петгодишната забрана за кандидатура на избори, која стапи во сила веднаш, за разлика од делумно условната затворска казна. Таа поднела посебна жалба против самата пресуда.

Следните претседателски избори, на кои Ле Пен планираше да се кандидира, се закажани за 2027 година. Со оглед на тековната политичка криза во Франција, постои можност и за предвремени парламентарни избори на кои исто така ѝ е забрането да учествува.