Прекини во снабдувањето со струја, забрана за продажба на гориво и откажани летни кампови: Украина го засилува притисокот врз Русија со напади врз Крим

Си-Ен-Ен – Вашингтон

Прекините во снабдувањето со електрична енергија продолжуваат да го мачат Севастопол, најголемиот град на Крим под руска контрола, по повторените и засилени украински напади врз полуостровот.

Гувернерот на градот назначен од Кремљ, Михаил Развожаев, вчера изјави дека се воведени рестрикции низ целиот град и ги повика жителите да го намалат оптоварувањето на електродистрибутивната мрежа. Командант на украинските сили за беспилотни летала, Роберт Бровди, изјави дека Киев ја нападнал главната трафостаница во Севастопол седум пати во раните часови во средата.

Русија го анектираше Крим во 2014 година – потег што беше широко осуден од меѓународната заедница – по протестите на Мајдан со кои беше соборен тогашниот проруски претседател на Украина, Виктор Јанукович. Пристанишниот град Севастопол историски е седиште на руската Црноморска флота.

Our long-range operations are consistent, precise responses to Russia dragging out the war and attacking Ukrainian cities and communities.

Last night, Defense Forces units struck the Poltavska oil depot in the Krasnodar region. The target was approximately 300 kilometers from… pic.twitter.com/jEixUzrWdY

— Volodymyr Zelenskyy / Володимир Зеленський (@ZelenskyyUa) June 25, 2026

Украинскиот претседател Володимир Зеленски уште кога беше избран во 2019 година амбициозно изјави дека сака да ја врати контролата врз Крим – порака која стана уште погласна по почетокот на целосната руска инвазија врз Украина во 2022 година.

Во последните недели, Украина ги засили своите воени напори таму, што го одразува поширокиот притисок на Киев врз Кремљ. Таа кампања го преврте секојдневниот живот на жителите на полуостровот, резултирајќи со чести напади со дронови, забрана за продажба на гориво за обичните граѓани и откажување на летните кампови за деца.

Една жителка на Севастопол изјави за Си-Ен-Ен (CNN) дека сирените за воздушна опасност во градот станале почести во последните недели, огласувајќи се по неколку пати на ден.

Таа опиша дека беспилотните летала летаат низ и околу градот, а пресретнувањата сега често се случуваат над самиот град, наместо над Црното Море како што беше претходно. Градот станал „поопасен“, рече таа.

Руската регионална власт на Крим во неделата соопшти дека горивото ќе биде достапно само за државните институции, а не и за обичните луѓе или за бизнисите. Жителката на Севастопол – која побара да остане анонимна од безбедносни причини – изјави за Си-Ен-Ен дека на бензинските пумпи нема гориво, но дека јавниот превоз сè уште функционира. Таа купила гориво додека сè уште било достапно, по значително повисока цена од претходно.

„Претпазливо“ расположение кај туристите

Крим е популарна туристичка дестинација за Русите и за Украинците уште од предсоветското време. За време на Втората светска војна, одморалиштето Јалта беше домаќин на историската средба меѓу британскиот премиер Винстон Черчил, американскиот претседател Френклин Рузвелт и советскиот лидер Јосиф Сталин. За време на војната, Крим доживеа и мрачно поглавје од советското владеење – присилната депортација на кримските Татари по наредба на Сталин.

Полуостровот беше симбол на комунистичкиот период. По независноста на Украина во 1991 година, познатите одморалишта на Крим почнаа да го губат сјајот, но неговите диви брегови и забави на плажа привлекуваа меѓународни туристи. По анексијата во 2014 година, рускиот претседател Владимир Путин инвестираше милијарди долари во Крим, претворајќи го во сè поразвиена туристичка дестинација. Но, таа иницијатива сега е под притисок бидејќи Крим се бори со прекини во снабдувањето со струја и со недостиг на гориво.

Шефот на Крим назначен од Русија, Сергеј Аксјонов, исто така оваа недела објави дека сите детски кампови ќе бидат затворени до 1 септември.

Неколку видеа снимени во Симферопол, вториот по големина град на Крим, кои беа објавени на интернет, покажуваат празни патишта и јавни простори. Во едно видео снимено околу 21 часот во вторникот, една жена го опишува градот како да се наоѓа „среде некаква апокалипса“.

Simferopol. Apokalypse 🙀

– Wir befinden uns irgendwie in einer Apokalypse. Es ist 9 Uhr abends, Simferopol, Sommer, Krim. Es gibt überhaupt keine Autos. Leute, wo seid ihr? Hallo? Man geht rum – es ist überhaupt niemand da. pic.twitter.com/dyoa7eBwoO

— Andy Schneider (@AndySch64494719) June 24, 2026

„Има само еден автомобил. Нема ништо друго надвор, чиста празнина“, вели таа.
Во друго видео објавено на социјалните мрежи во средата, еден жител зборува за празните полици во локален супермаркет откако кафулињата и мензите престанале да работат.

„Сакавме да каснеме нешто, но нема ништо. Полиците се празни“, вели тој.

Сопственичката на куќа за гости во туристичкото место Нови Свет изјави за Си-Ен-Ен дека гостите сè уште доаѓаат и дека расположението е „претпазливо, но не и панично“.

„Што се однесува до нас лично, во моментов не гледам критични влијанија врз работата на објектот. Гостите продолжуваат да доаѓаат, морето, плажите, кафулињата и туристичката инфраструктура функционираат. Сепак, постои неизвесност и зголемено внимание кон вестите“, рече таа.

„Наскоро нема да имаме што да јадеме“

Жителите на полуостровот често не сакаат јавно да зборуваат поради строгата контрола што ја спроведува Русија. Но, објавата на Аксјонов на Телеграм за широката забрана за продажба на гориво предизвика стотици реакции во кои луѓето ја изразуваат својата фрустрација.

Еден корисник, таксист по име Александар, го праша шефот на републиката како треба да го издржува семејството и да ги отплаќа кредитите.

„Ги прашав банките што да правам со кредитите. Едноставно ќе немам пари за да ги плаќам – а наскоро нема да имаме што да јадеме, ниту пак средства да купиме храна. Банките одбиваат да одобрат грејс-период, велејќи дека не е прогласена вонредна состојба“, напиша тој во средата.

Друга корисничка на Телеграм, Дијана, истакна дека нејзиниот бизнис со снабдување со разладено пилешко месо зависи од дизел горивото.

„Нашите производи се лесно расипливи. Меѓу нашите клиенти се сите трговски синџири и пазари низ полуостровот“, напиша таа.

Трета корисничка, Олесија, во вторникот коментираше дека е невозможно да се стигне на работа со јавен превоз бидејќи тролејбусите се преполни и преоптоварени.

„Едноставно нема место за повеќе патници. А сите мораат да стигнат на работа“, напиша таа.

Украина се обидува да го зголеми притисокот врз Кремљ за да го принуди на мировни преговори, изведувајќи напади подлабоко во руска територија, каде што првенствено таргетира рафинерии за нафта, но и изведува големи напади со дронови во руската престолнина и во Санкт Петербург.

Се забележува растечко незадоволство кај дел од Русите бидејќи војната полека им доаѓа пред врата. Сега, на Крим, Киев систематски ги таргетира клучните сообраќајни врски и рути за снабдување кои го поврзуваат полуостровот со руските сили на југот, со цел да ја наруши логистиката и да ја изолира тамошната воена инфраструктура. Зеленски во средата изјави дека операцијата на Крим е „внимателно пресметана“ за да се „создадат услови кои ќе ја натераат Русија да избере мир“.

„Ситуацијата е тешка“, изјави за Си-Ен-Ен Татјана Становоја, основачка на фирмата за политичка анализа „R.Politik“. Сепак, таа не верува дека зголемените внатрешни притисоци врз Путин ќе влијаат врз неговите размислувања и цели во Украина.

„Сите овие напади само ќе придонесат за антиукраинско расположение во Русија – повеќе продржавно, а не директно пропутинско расположение. Малку е веројатно дека тоа ќе доведе до некаква политичка промена“, рече Становоја.

Според неа, кампањата на Киев значи дека кога Русите ќе прашаат зошто земјата продолжува да се бори, „сега Путин може да им понуди одговор“.

јуни 27, 2026