Самит на ШОС во Киргистан: Русија најавува поголеми инвестиции и засилена економска соработка

Енергетската и прехранбената безбедност ќе бидат меѓу главните теми на утрешниот самит на Советот на лидери на Шангајската организација за соработка (ШОС) во Бишкек, потврди специјалниот претставник на рускиот претседател за инвестиции и економска соработка со странство и директор на Рускиот фонд за директни инвестиции (РДИФ), Кирил Дмитријев, најавувајќи проширување на инвестициските пакети и заемните економски проекти.

– Без сомнение, на дневен ред на ШОС се енергетската безбедност и безбедноста на храната, во области во кои Русија има апсолутно клучна улога во светот – изјави Дмитријев.

Тој истакна дека ШОС е еден од најважните партнери на Русија, посочувајќи дека извозот на прехранбени производи од Русија во земјите членки на организацијата минатата година се зголемил за 17 отсто.

– Затоа, без сомнение, ќе ги зголемуваме инвестициските пакети и бројот на зделки и сè повеќе ќе реализираме заеднички проекти со земјите од ШОС, насочени кон заемно корисна економска и инвестициска соработка – рече Дмитријев.

Рускиот претседател Владимир Путин денеска допатува во Киргистан, каде што на маргините на самитот на ШОС во Бишкек е предвидено да разговара со кинескиот претседател Шји Џјинпинг и со индискиот премиер Нарендра Моди.

Состанокот на Советот на лидери на земјите членки на ШОС официјално ќе се одржи утре во Бишкек.