Трамп: Заедниците што не сакаат дата центри ќе останат „назадни и сиромашни“

Американскиот претседател Доналд Трамп упати остри критики до локалните заедници кои се спротивставуваат на изградбата на центри за податоци (дата центри), предупредувајќи ги дека со тоа ризикуваат да останат „назадни и сиромашни“, во време кога прашањето за инфраструктурата за вештачка интелигенција станува една од клучните теми пред претстојните избори за Конгресот.

„Единствената причина поради која заедниците низ САД не би сакале центри за податоци е ако сакаат да останат назадни и сиромашни. Ако сакаат да бидат успешни и богати, со многу пониски даноци и работни места насекаде, нека владеат податоците“, напиша Трамп во објава на социјалната мрежа „Трут соушл“.

Тој долго време го нагласува значењето на развојот на вештачката интелигенција, повеќепати изразувајќи желба САД да ја победат Кина во глобалната трка во областа на ВИ.

„Ако ја убиеме кокошката што несе златни јајца, само самите ќе бидете виновни. Кина не би можела да биде посреќна поради ова движење против центрите за податоци. Всушност, не можат да поверуваат дека ова се случува!“, порача Трамп.

Центрите за податоци ја обезбедуваат компјутерската моќ неопходна за обработка на големи количества податоци, каква што е потребна, меѓу другото, за функционирање на системите со вештачка интелигенција. Тие вообичаено содржат илјадници компјутерски сервери и бараат огромни површини земјиште, вода за ладење и енергија, што потенцијално може да ги оптовари локалните електроенергетски мрежи, додека долгорочно вработуваат мал број работници во однос на нивната големина. 

Прашањето за центрите за податоци стана важна тема во пресрет на изборите за Конгресот, при што компаниите од секторот на вештачката интелигенција трошат милиони долари на изборни трки и партиски предизбори за кандидати кои поддржуваат или се спротивставуваат на регулацијата на вештачката интелигенција.

На прашањето за објавата на Трамп и за тоа како таа би можела да биде примена пред изборите, потпретседателот Џеј Ди Венс рече дека пораката на претседателот била фокусирана на економските аспекти на центрите за податоци.

„Она што претседателот го кажа за центрите за податоци е дека тие се важен дел од економијата на вештачката интелигенција. Но, кога се градат, заедно со центрите за податоци мора да се градат и електроцентралите“, рече Венс.

Венс го призна незадоволството што го предизвикуваат центрите за податоци, изразувајќи уверување дека загриженоста произлегува од повисоките сметки за комунални услуги и електрична енергија. Сепак, тој оцени дека тоа не би било проблем доколку компаниите ги искористат напорите за дерегулација.

– Мислам дека веројатно 99 отсто од незадоволството од центрите за податоци доаѓа од области каде што изградбата на центар за податоци значи повисоки комунални трошоци и поскапа електрична енергија за луѓето што живеат таму –  рече Венс.

– Затоа мислам дека овие компании треба да ги искористат некои од федералните напори за дерегулација што ги презедовме. Ако градите центар за податоци, треба да внесувате електрична енергија во мрежата, а не да ја одземате. Ако тоа се случува, тогаш не мислам дека центрите за податоци се толку контроверзни – додаде тој.

Претходно овој месец, Националниот републикански сенаторски комитет, изборниот комитет на републиканците во Сенатот, испратил меморандум до компаниите за вештачка интелигенција што работат во Охајо, предупредувајќи дека незадоволството поради центрите за податоци би можело да им наштети на шансите за реизбор на актуелниот републикански сенатор Џон Хастед.

Републиканскиот гувернер на Тексас, Грег Абот, неодамна, исто така, ги стави во мирување новите проекти за центри за податоци за да обезбеди усогласеност со прописите, што Трамп го критикуваше како „грешка“.

„Видов дека Тексас неодамна некако се спротивставува на центрите за податоци. Мислам дека тоа е грешка. И не заземам ставови, само мислам дека е грешка, бидејќи има други заедници кои ги сакаат. Кога една заедница ги сака, тоа значи дека во неа ќе влезат многу пари“, изјави Трамп во интервју за „Панчбоул“ претходно овој месец.

Во интервјуто за „Панчбоул“, тој оцени дека центрите за податоци се „огромно важни за економијата“ и рече дека би можеле да бидат „поголеми од нафтата“.