Бернам му оддаде признание на Стармер пред преземањето на премиерската функција

Новиот лидер на британската Лабуристичка партија, Енди Бернам, денеска му оддаде признание на својот претходник Кир Стармер, нагласувајќи дека неговата работа ја поставила основата за идните успеси на партијата.

Бернам, кој в понеделник ќе го наследи Стармер на премиерската функција и ќе се пресели на Даунинг стрит 10, најави дека ќе гради „нова политика“, по неговата брза транзиција од градоначалник на Голем Манчестер до иден британски премиер.

Во својот прв говор како лидер на лабуристите, Бернам истакна дека ќе ја продолжи работата изградена „врз темелите што повеќе од кој било друг ги постави една личност“.

– Под водство на Кир Стармер, од нашиот најголем пораз стигнавме до една од најголемите победи во историјата. Тој повторно ја доведе Лабуристичката партија во позиција да ги менува животите на луѓето, а токму тоа го правевме во изминатите две години – рече Бернам.

Тој му се заблагодари на Стармер за неговата „служба за партијата и државата“ и ги пофали реформите што ги спроведе, меѓу кои се проширувањето на правата на работниците и станарите, намалувањето на листите на чекање во Националната здравствена служба (НХС) и повторното државно преземање на железничкиот систем.

Бернам го поздрави и усвојувањето на Законот за Хилсборо, кој неделава беше одобрен во Долниот дом на британскиот парламент, оценувајќи дека станува збор за „најголемото воспоставување рамнотежа во системот на правдата што оваа земја некогаш го видела“.

Тој потсети дека пред десет години заедно со Стармер работеле на првата верзија на законот по втората истрага за трагедијата на стадионот „Хилсборо“.

– Во вторникот, кога Кир го исполни ветувањето дадено на семејствата на жртвите од Хилсборо и на сите активисти кои се бореа за овој закон, почувствував дека животот направи целосен круг. Тоа е ветување да се стави крај на културата на прикривање, да им се даде повеќе моќ на граѓаните и никој повеќе да не го доживее она низ што поминаа семејствата на жртвите – изјави Бернам.