Поранешниот претседател на Јужна Кореја е осуден на две години затвор

Јужнокорејскиот суд денеска го осуди поранешниот претседател Јун Сук Јеол на две години затвор откако го прогласи за виновен за нелегално примање на 270 милиони вони (околу 157.000 евра) за услуги за анкетирање на јавното мислење кои без надомест му ги пружил политички посредник, објавија локалните медиуми.

Окружниот суд во Сеул утврди дека Јун ги прекршил законите за политичко финансирање со тоа што примил 14 бесплатни анкети на јавното мислење од политички посредник, а потоа го искористил своето влијание при номинирање на поранешен пратеник да му ја возрати услугата, се наведува во пресудата.

Јун ги негира обвинувањата, тврдејќи дека не барал анкети ниту ветил ништо за возврат.

Одлуката се разликува од претходните судски пресуди во случаите во кои се вклучени поранешната прва дама Ким Кеон Хи, кои утврдија дека немало надомест за услуги за анкетирање на јавното мислење.

На денешната пресуда е можно поднесување жалба.

Против Јун (65) се водат осум судски постапки. Тој моментално се жали на доживотната казна што му беше изречена во февруари откако судот го прогласи за виновен за организирање бунт поврзан со неговото краткотрајно прогласување вонредна состојба во 2024 година.

Меѓу другите случаи е и одлуката на Врховниот суд од минатата недела со која се потврди седумгодишната затворска казна за попречување на обидите на властите да го уапсат.