Финансиска поддршка од 5.000 денари за 360 полуматуранти од општина Ѓорче Петров

Општина Ѓорче Петров за првпат воведува еднократна финансиска поддршка за полуматурантите од општината. Градоначалникот Александар Стојкоски ги потпиша решенијата за исплата на финансиска поддршка во износ од 5.000 денари за 360 полуматуранти од Ѓорче Петров, соопштија денеска од локалната самоуправа.

Во соопштението се додава дека оваа мерка претставува конкретна поддршка за учениците и нивните семејства, во период кога младите завршуваат едно важно поглавје од своето образование и се подготвуваат за нови предизвици.

– Младите се нашата иднина и наша најголема обврска. Со оваа мерка покажуваме дека Општина Ѓорче Петров ги вреднува учениците, го поддржува образованието и стои зад семејствата. За првпат воведуваме ваква поддршка, затоа што силна заедница се гради со грижа, посветеност и конкретни дела – се наведува во пишаната изјава на градоначалникот.

Од Општина Ѓорче Петров посочуваат дека поддршката за младите, образованието и семејствата, останува еден од главните приоритети во работењето на локалната самоуправа.