Ирачките власти уапсија функционери и пратеници во голема антикорупциска акција

Ирачките власти приведоа повеќе државни функционери и пратеници во рамките на обемната акција против корупцијата, спроведена во текот на изминатата ноќ на неколку локации во владината Зелена зона во Багдад.

На видеоснимките објавени на интернет се слушаат истрели, а на нив се гледаат тенкови и воени возила распоредени во Зелената зона, каде што се наоѓаат владините институции и странските амбасади.

Според локалните медиуми, уапсени се повеќе од осум лица, додека некои извори наведуваат дека се приведени 15 лица, меѓу кои и високи политичари и државни функционери.

Ирачката државна новинска агенција ИНА соопшти дека апсењата се поврзани со обвиненија за корупција, покренати по признанијата на поранешниот заменик-министер за нафта, Аднан ал Џумаили. Според информациите, приведени се и неколку пратеници.

Видеоснимките покажуваат припадници на специјалните сили како влегуваат во неколку куќи во рамките на, како што се наведува, специјалните операции. Зелената зона, каде што живеат високи државни функционери и нивните семејства, привремено беше блокирана.

Новиот ирачки премиер Али ал Заиди ја означи борбата против корупцијата и злоупотребата на државните средства како еден од главните приоритети на неговата влада.

Ал Џумаили и еден поранешен гувернер веќе се приведени. Според медиумските извештаи, истражителите досега запленија средства во вредност од околу 85 милиони долари, како и десетици недвижности, автомобили и златен накит.

Според дел од аналитичарите, покрај сузбивањето на корупцијата, овие активности би можеле да претставуваат и обид на ирачкиот премиер уште на почетокот од својот мандат, кој започна пред шест недели, да изврши притисок врз своите политички противници.

Зелената зона претставува фактички центар на власта во Багдад. Ваквите операции таму се исклучително ретки, но во последниот период во околината се регистрирани протести и судири.