Калас разговараше со Родригез за последиците од земјотресите во Венецуела и најави помош од пет милиони евра

Шефицата на европската дипломатија, Каја Калас објави денеска дека Европската Унија подготвила пет милиони евра помош за областите погодени од земјотресите во Венецуела, како и помош во мапирањето на штетите.

Калас на мрежата Икс објави дека разговарала со вршителот на должноста претседател на Венецуела, Делсеа Родригез, и дека ѝ ја пренела „целосната солидарност на ЕУ со народот на Венецуела и нејзиното најдлабоко сочувство до семејствата на оние кои ги загубија своите најблиски“.

Калас, исто така, го објави активирањето на Европскиот механизам за цивилна заштита и додаде дека „неколку земји-членки (ЕУ) брзо распоредија тимови за пребарување и спасување, пожарникари и медицински персонал“.

„Сателитскиот систем на ЕУ „Коперникус“ ги поддржува службите за итни случаи, помагајќи во мапирањето на штетите и насочувањето на помошта таму каде што е најпотребна“, се додава во соопштението.

Калас заклучи дека „Европа е со Венецуела во овој момент на неволја“.

Во двата разорни земјотреси во Венецуела што се случија пред неколку дена, според најновите официјални податоци, загинаа 1.430 луѓе, а повеќе од 68.000 се водат како исчезнати.