Пожар во угостителски објект во Велес

Во угостителски објект на улицата „Никола Карев“ бр. 33 во Велес, синоќа околу 22 часот избувнал пожар, кој, според првичните информации, започнал во кујната и предизвикал материјална штета.

Од Секторот за внатрешни работи Велес информираат дека се опожарени предмети, инвентар, електрична инсталација и дел од фасадата на објектот. Пожарот бил изгаснат од екипи на Територијалната противпожарна единица (ТППЕ) Велес, а увид на местото извршила увидна екипа на СВР Велес.

Од ТППЕ Велес соопштија дека дојавата за пожарот во кафаната „Шкорпион“ била примена во 22:10 часот, по што на терен веднаш биле испратени две противпожарни возила и шест пожарникари.

По пристигнувањето било констатирано дека гори кујнскиот дел од објектот. Благодарение на брзата и навремена интервенција, пожарникарите успеале да спречат експлозија на плинска боца која се наоѓала во кујната, со што била избегната можноста за многу поголема материјална штета и сериозни последици.

Причините за избувнувањето на пожарот ќе бидат утврдени по завршување на истрагата.