Во Велес заврши Гастрономската недела

Со завршување на Мастер класовите каде велешките средношколци од Државното средно училиште Регионален центар  „Коле Неделковски“ од Велес неколку дена во своите училници и кабинетот  по кулинарство   учеа  и  готвеа  интересни специјалитети од повеќе земји заедно со врвните и реномирани шефови од меѓународната гастрономски сцена од повеќе земји, денеска во Велес заврши Гастрономската Недела што за првпат ја организира Општина Велес во соработка со Гастро Мак и ДСУ РЦСОО „Коле Неделковски“.

Гастрономската Недела започна започна со оценување на најдобрата  велешката пита пастрмајлија во рамките на годинашната манифестација „Питијада 2026“ а продолжи со „Дипломатското котле“ кога се презентираа велешки и македонски специјалитети. Неделата продолжи и заврши со предавања и Мастер класови   со готвење и часови за келнерите што ги држеа врвните меѓународни готвачи и менаџери во кулинарството дојдени во Велес  од повеќе земји, а  меѓу кои: Стево Карапанџа, Уве Мишел, Драгица Лукин, Изток Легат, Дон Давид, Доменико Маџи, Томаж Возељ, Ѓорѓе Костиќ, Георге Дамјаноу, Вуко Митровиќ, Ерих Главица, Емрах Коксел., нашиот шеф Љупчо Гиевски и Горан Богоевски,  директор на ова Државно средно училиште.

.Велешките средношколци од ДСУ РЦСОО „Коле Неделковски“ од насоката за кулинарство, за идни  готвачи и келнери  во изминатите денови научија да подготвуваа интересни рецепти од повеќе земји, а  прилагодени со продукти, кои се произведени во бавчите и градините од велешкиот поширок регион и од Македонија.

Последен од врвните меѓунадни кулинари, а  кој им одржа Мастер клас за готвење беше Ѓорѓе Костиќ, реномираниот кулинар од соседна Србија,од Белград, а  кој се  одлучи идните готвачи да ги научи на интересни јадења од веганско- вегетаријанската кујна, со рецепти од мени на некои соседни и подалечни земји меѓу кои и интересни грузијски предјадења, подготвени од многу зеленчук. Воедно тој ги научи учениците и  за подготовка на вегетаријански хамбургер со соја и зеленчук и  вегетаријанско  суши со ориз и зеленчук како моркови и краставица, и сосови, а  од што учениците и професорите најмногу се воодушевија и самите потоа се обидоа  и беа среќни што научија да го подготвуваат и на крајот и заедно да го  пробаат.

Во изјавата за МИА, врвниот кулинар Ѓорѓе Костиќ ни појасни дека се одлучил со учениците на Мастер клас во кабинетот по кулинарство  да подотвува веганско-вегетаријанско јадења затоа што се ближат деновите на постите и бројните православни слави каде домаќините подготвуваат посни  јадења.

-Јас се одлучив учениците да ги запознаам и да им подготвам интересни јадења од веганско-вегетаријанската кујна од повеќе земји, но исклучиво со земјоделски производи кои можеме да ги најдеме во велешко и во Македонија. Сега настапуваат  денови на пост и сакав учениците да знаат што е тоа веганско кујна и по што таа се разликува од вегетаријанската. Воедно како правилно  да ја подготвуваат храната, како да ги заменат јајцата и сирењето,а како да ги искористат мошне здравите  соја, хељда,овес, р’ж и јачмен. Во текот на готвењето  на ученицит освен рецептите им пренесов и некои мои мали  тајни на кулинарството, појасни Костиќ.

Додаде дека  навистина  е  среќен што  имал чест да биде нивни ментор во оваа училиште. Тој  е  воодушевен од наставниот кадар, и директорот кој исто така е готвач и ментор   и оцени дека  сите се многу  вредни и сакаат да придонесат  да им помогнат на своите ученици да освојуваат што повеќе и повеќе нови знаења.

Инаку од Гастро Мак потенцираат  дека со оваа Гастрономска Недела, Велес станува центар на гастрономијата во земјава  и можност за привлекување што повеќе странски туристи, а  од Општина  Велес  како  организатори , планираат истата да прерасне во традиционална.