„Вински фестивал – Македонско село“ од 16 до 18 октомври

Со мото „Вкуси ја Македонија во чаша“, од 16 до 18 октомври во комплексот „Македонско село“ ќе се одржува првото издание на „Вински фестивал – Македонско село“, посветен на македонското вино, гастрономијата, музиката и традицијата.

-Фестивалот е замислен како место каде што ќе се сретнат љубителите на виното, домашните производители и публиката, во амбиент кој природно ја раскажува македонската приказна. Во винската зона посетителите ќе имаат можност да дегустираат вина од македонски винарии, да ги запознаат нивните производи и да уживаат во разни вински и гастрономски комбинации. Фестивалската влезница чини 1.000 денари, а со неа посетителите на влез добиваат фестивалска чаша и можност за неограничена дегустација на вината од учесниците, соопшти организаторот. 

Покрај винската понуда, фестивалот ќе има и посебни гастрономски зони – „Вино & Сирење“, „Сладок корнер“, „Кафе & Кроасан“ и „Скара корнер“, со различни вкусови и производи кои ќе го надополнат винското искуство. 

Во трите фестивалски вечери музичката програма ќе биде исклучиво македонска. Ќе почнува во текот на денот (в петок од 16 часот и напладне во деновите од викендот), а фестивалските вечери ќе завршуваат со настапи на главната сцена. На фестивалот ќе има и содржини за најмладите.

Прв на сцената в петок, во 16 часот, ќе настапи диџеј Бранчез, по него следуваат Нино Величковски и неговите тамбураши, Благица Павловска и од 20 часот –  Игор Џамбазов и Гуру Харе бенд. В сабота (17 октомври) музичката програма ќе почне со диџеј Ерик Фокс во 12 часот, потоа ќе настапат тамбурашите Ѓезме, Александар Тарабунов, Александар Јосифовски, а од 20  часот е концертот на  Дамјан Стојаноски и неговиот оркестар. Неделата (18 октомври) е резервирана за група Коштана (12:00), по што ќе следуваат настапите на Смиља Митревска, Огнен Здравковски, Ѓоко Танески и од 20 часот настапот на диџеј Галоски. 

-За посетителите кои сакаат целосно да го доживеат фестивалот, „Македонско село“ подготви и посебна винска викенд-понуда со сместување, појадок, фестивалски влезници и дегустација на вината. За полесен пристап и безбеден превоз од и до фестивалот, во текот на трите фестивалски дена ќе биде организиран и автобуски превоз кон комплексот „Македонско село“. Автобусите ќе сообраќаат на секои 30 минути од две локации во Скопје – паркингот кај СЦ „Борис Трајковски“ и последната автобуска постојка кај Цветен пазар, со што посетителите ќе имаат дополнителна можност да стигнат до фестивалот, се наведува во соопштението.