Американски функционер: Нема промена во споделувањето разузнавачки информации на САД со Украина

Нема „промена“ во споделувањето воени разузнавачки информации од САД со Украина, изјави американски функционер за француските медиуми откако Киев соопшти дека не добил предупредувања за претстојни руски напади.

„САД не ја променија својата политика за споделување разузнавачки информации со своите сојузници и партнери, како што е Украина“, рече американскиот функционер.

Генералниот секретар на НАТО, Марк Руте, исто така, се осврна на вчерашната изјава на американскиот претседател Доналд Трамп во која се потврдува дека Вашингтон продолжува да споделува разузнавачки информации со Киев.

„Ние им помагаме. Ние им помагаме и споделуваме разузнавачки информации“, рече Трамп.

Украина се потпира на западните, а особено на американските, воени разузнавачки информации за откривање на руски напади и напаѓање цели. Неодамнешните тензии меѓу украинскиот претседател Володимир Зеленски и неговиот американски колега, кој изрази поддршка за отстранување на украинскиот лидер, предизвикаа загриженост во Киев дека оваа витална поддршка може да еродира.

„Не само што Русите ја уништуваат нашата енергетска инфраструктура, туку Украина дури и не добива предупредување однапред за лансирање на балистички ракети“, рече украинскиот претседател.

Висок украински функционер денес за француските медиуми изјави дека Вашингтон се заканил дека ќе престане да споделува разузнавачки информации со Киев доколку Украина не ги прекине нападите врз руските рафинерии за нафта.