Во Германија почна судењето на Украинец обвинет за нападите врз „Северен тек“

Поранешен украински армиски офицер, обвинет дека учествувал во планирањето и извршувањето на нападите врз гасоводите „Северен тек“ пред четири години, денеска застана пред Вишиот покраински суд во Хамбург под обвинение за воени злосторства.

Судењето, кое привлече големо внимание кај меѓународната јавност и медиуми, претставува прва судска постапка против еден од осомничените за нападите во Балтичкото Море во 2022 година.

Обвинетиот, идентификуван како Серхиј К. согласно германските закони за заштита на приватноста, е осомничен за предизвикување експлозија со експлозивни средства, уништување критична инфраструктура и нарушување на јавните услуги. Бидејќи во тоа време бил офицер во украинската армија и наводно дејствувал со знаење на украинските власти, обвиненијата опфаќаат и воени злосторства.

Според обвинителниот акт прочитан во судницата, Серхиј К. бил дел од воениот персонал што, во име на украинските власти, подготвил план за уништување на гасоводите изградени за транспорт на руски природен гас до Германија. Наводната цел на операцијата била да се ограничат финансиските средства на Русија за водење војна, кратко време по нејзината целосна инвазија врз Украина.

Педесетгодишниот обвинет е осомничен дека предводел тим во кој имало неколку професионални нуркачи, капетан на пловило и експерт за експлозиви. Според обвинението, тимот пренел големи количества воени експлозиви со висока разорна моќ до водите во близина на данскиот остров Борнхолм, користејќи едрилица изнајмена во северногерманскиот град Росток.

Во близина на Борнхолм, членовите на тимот наводно поставиле експлозивни направи со временски механизам на гасоводите на морското дно. Експлозиите се случиле на 26 септември 2022 година и предизвикале сериозни оштетувања на двата гасовода, „Северен тек 1“ и „Северен тек 2“. Подоцна биле откриени четири истекувања на гас на три од вкупно четирите цевководи.

Пред нападот, преку „Северен тек 1“ се транспортирал руски природен гас до Германија, додека „Северен тек 2“ сè уште не беше пуштен во употреба. Во месеците по целосната инвазија врз Украина, Москва веќе неколкупати ја намалуваше или целосно ја прекинуваше испораката на гас преку „Северен тек 1“.

Серхиј К. беше уапсен кон крајот на август 2025 година, додека бил на одмор со семејството на италијанскиот јадрански брег, а три месеци подоцна беше екстрадиран во Германија, каде што му беше одреден притвор.

Денеска, пред почетокот на судскиот процес, околу 20 Украинци протестираа пред судската зграда, барајќи обвинетиот да не биде осуден за воени злосторства. „Украина има право да се брани за да преживее“, изјави портпаролот на демонстрантите.