Украина: 600.000 домаќинства се без струја по масовните руски напади

Најмалку 600.000 домаќинства во Украина останаа без електрична енергија по масовните руски напади со десетици балистички ракети и повеќе од 100 дронови извршени во текот на ноќта, соопшти украинскиот претседател Володимир Зеленски, додека полицијата потврди дека во Киев има и жртви.

Русија употребила 39 балистички ракети и над 102 дрона насочени против украинското снабдување со енергија и критичната инфраструктура, напиша Зеленски на социјалните мрежи, додавајќи дека е причинета значителна штета на 26 објекти од енергетската инфраструктура и на четири локации поврзани со нафтениот и гасниот сектор.

Украинскиот претседател ја обвини Москва дека не го почитува повикот на американскиот претседател Доналд Трамп за прекин на нападите врз енергетските објекти. Тој го опиша нападот како намерен и со исклучителни размери, истакнувајќи дека „никогаш досега немало толку демонстративно непочитување на Америка од страна на Русија“.

Зеленски го повика Трамп да воведе строги санкции против Русија и побара дополнителни системи за противвоздушна одбрана „Патриот“, кои се сметаат за ефикасни против балистички ракети, а со кои Украина располага во недоволен број.

Според украинската полиција, пет лица загинале во главниот град Киев. Уште две лица загинале во нападите во Днепропетровската област доцна синоќа и во текот на ноќта, додека шестмина биле повредени.

Руското Министерство за одбрана потврди дека утрово извршило напади врз комуникациската и енергетската инфраструктура во Киев и околината, како и во Харковската област, со образложение дека целите се поврзани со одбранбената индустрија и украинските вооружени сили.

Од друга страна, Русија соопшти дека пресретнала 902 украински дрона над својата територија и анектираниот полуостров Крим. Поради нападите со дронови, во Русија повторно беа воведени ограничувања на работата на неколку аеродроми, вклучувајќи ги и четирите што го опслужуваат главниот град Москва, објавија руските агенции, повикувајќи се на воздухопловната управа „Росавијација“.

Проблемите на руските аеродроми траат веќе неколку дена поради украинските напади со дронови, поради што авионите морале да се пренасочуваат за време на летот или да слетуваат на алтернативни аеродроми, оставајќи патници заглавени.

Гувернерот на Саратовската област, Роман Бусаргин, на Телеграм објави дека едно лице загинало во украински напад со дрон врз градот Балаково, каде што се оштетени и неколку станбени згради. Во меѓувреме, најголемата руска банка, „Сбербанк“, потврди дека бил нападнат еден од нејзините центри за обработка на податоци, но соопшти дека сите системи функционираат нормално.

Војната меѓу Русија и Украина трае повеќе од четири и пол години, при што Украина сè почесто напаѓа цели длабоко на руска територија, далеку од линијата на фронтот.