Во Белгија денеска штрајк на вработените во јавниот сектор

Во Белгија денеска се очекува уште еден протест на синдикатите против владината политика, откако во петокот се одржа помасовна протестна акција, пренесе агенцијата Белга.

Денешниот штрајк е на вработените во јавниот сектор. Штрајкот е насочен против недоволното финансирање на јавните услуги и претстојните нови буџетски мерки на владата, вклучувајќи го и повторното ограничување на индексацијата на платите и зголемувањето на стапката на ДДВ.

Се очекуваат тешкотии во функционирањето на неколку сектори, но нивниот целосен обем сè уште не е познат. Фламанскиот оператор за јавен градски превоз очекува сериозни прекини во сообраќајот и изработи алтернативен возен ред.

Штрајк почна и во железничкиот сообраќај, каде што денеска ќе сообраќаат помал број возови.

Јавните радио и телевизиски сервисни оператори исто така ќе бидат сериозно погодени. Нивните програми ќе бидат значително скратени, а многу од вообичаените емисии нема да се емитуваат. Радиостаниците ќе емитуваат претежно музика.

Можно да бидат погодени и училиштата. Застои и прекини се очекуваат и на други места, вклучувајќи ги и општинските администрации. Функционирањето на поштенскиот оператор исто така може да биде нарушено.