ИЕА ги повика земјите членки да го забрзаат ослободувањето на дизелот од резервите

Меѓународната агенција за енергетика (ИЕА) ги повика земјите членки да ја забрзаат испораката на дизел од стратешките резерви и да разгледаат дополнително ослободување на резерви, предупредувајќи на сè поголемите притисоци врз глобалниот пазар на горива.

Извршниот директор на ИЕА, Фатих Бирол, ги повика владите кои сè уште не го реализирале во целост ветеното ослободување на нафтените резерви од март да ги забрзаат испораките, со приоритет за дизелот.

Тој исто така ги повика членките кои веќе ги исполнија своите обврски да проценат дали се потребни дополнителни количини, како и да ги одредат нивниот обем и времето на испорака.

„Моменталните пазарни услови бараат итно внимание и најдобро можат да се решаваат со продолжување на соработката меѓу членките на ИЕА“, наведе Бирол во соопштение објавено во пресрет на состанокот на управниот одбор на агенцијата, закажан за 15 октомври.

Тој истакна дека заедничкото делување е неопходно за зачувување на енергетската безбедност и економската стабилност, посебно имајќи ги предвид новите напади врз цивилната и енергетската инфраструктура во Саудиска Арабија, земја богата со нафта.

Претходно месецов, земјите од Групата седум (Г7) постигнаа договор за итно ослободување на до 100 милиони барели дизел и сурова нафта од резервите, откако администрацијата на американскиот претседател Доналд Трамп им се закани на европските земји со забрана за извоз на дизел доколку не преземат дополнителни мерки за совладување на рекордно високите цени.

Сепак, земјите од Европската Унија главно се согласија дека договорот на Г7 всушност ќе претставува спроведување на обврските преземени во март, а не ослободување на дополнителни количини гориво.

ИЕА има 32 членки, вклучувајќи ги САД и голем број европски земји. Организацијата во март договори ослободување на 400 милиони барели нафта од стратешките резерви, што е најголема таква интервенција во нејзината историја, како одговор на војната во Иран.