Министерството за правда на САД ги истражува телевизиските мрежи поради бојкотот на известувањето од Белата куќа

Американското Министерство за правда соопшти дека истражува дали телевизиските мрежи ги прекршиле сојузните закони за заштита на конкуренцијата со одлуката за бојкотирање на известувањето од Белата куќа.

Телевизиските мрежи што се предмет на истрагата се Еј-Би-Си (ABC), Си-Би-Ес (CBS), Си-Ен-Ен (CNN), Ен-Би-Си (NBC) и Фокс њуз (Fox News), соопшти Министерството за правда.

– Заедничкиот бојкот на пазарни конкуренти може да претставува прекршување на Шермановиот закон – изјави портпаролот на Министерството за правда.

Шермановиот закон е првиот сојузен закон на САД за заштита на конкуренцијата, донесен во 1890 година. Со него, меѓу другото, се забрануваат договори, спогодби или заговори што ја ограничуваат слободната трговија, вклучително и заедничките бојкоти.

– Одделот за заштита на конкуренцијата спроведува истрага за да утврди дали овие медиумски организации ги прекршиле законите за заштита на конкуренцијата – додаде портпаролот.

Оваа истрага е најновата во низата судири меѓу администрацијата на Трамп и големите медиумски куќи. Претседателот Доналд Трамп често мејнстрим-медиумите ги нарекува „лажни вести“ и често влегува во расправии со новинарите за време на средбите со медиумите.

Овој потег создава и правен, а потенцијално и финансиски притисок врз медиумите да продолжат да известуваат за претседателот, дури и кога не се согласуваат со начинот на кој Белата куќа постапува со нив.

Телевизиските мрежи не одговорија веднаш на барањата за коментар.

Истрагата следува по повеќенеделните тензии меѓу Белата куќа и медиумите.

На 19 септември, Белата куќа им забрани влез во зградата на новинарите на Си-ен-ен, Политико и МС НАУ (MS NOW), одземајќи им ги акредитациите. Од Белата куќа порачаа дека известувањето за претседателот е „привилегија, а не право“.

Засегнатите медиуми ја тужеа администрацијата, тврдејќи дека нивното исклучување го прекршува Првиот амандман на Уставот на САД и дека Белата куќа им се одмаздува поради начинот на кој известуваат.

Си-ен-ен е една од петте медиумски организации што го сочинуваат примарниот новинарски пул на Белата куќа, заедно со Еј-Би-Си, Си-би-ес, Фокс њуз и Ен-би-си. Овие организации ги делат трошоците за следење на претседателот, наизменично го организираат известувањето и ги споделуваат снимките со медиумите низ целата земја.

Сите телевизиски мрежи што ја следат Белата куќа, вклучително и Фокс њуз, го прекинаа известувањето во знак на солидарност и одбија да обезбедат замена за следењето на настаните.

Белата куќа ги врати акредитациите на 24 септември, откако американскиот окружен судија Тимоти Кели пресуди дека забраната веројатно е противуставна и ѝ наложи на администрацијата „веднаш да им го врати, повторно да го воспостави и обнови“ пристапот.

Сепак, споровите околу пристапот до одредени претседателски настани и распоредот на новинарскиот пул продолжија и по таа одлука.