Германските социјалдемократи ќе одржат нови партиски избори по оставката на Бас

Социјалдемократите во Германија (СПД) планираат да одржат нови избори за своето цело раководство во следните месеци, по ненадејната оставка на копретседателката Бербел Бас.

Нејзиниот сопартиски лидер Ларс Клингбајл денеска објави дека гласањето ќе се одржи на следната конференција во декември или јануари.

Тој не откри дали и тој повторно ќе се кандидира за раководството, но изјави дека и понатаму верува оти партијата треба да има дуо на врвот.

Само неколку часа порано, Бас објави дека поднесува оставка од нејзините функции како министерка за труд и копретседателка на СПД, наведувајќи ја смртта на нејзината поќерка и јавните напади од конзервативните коалициски партнери.

Бас (58) соопшти дека ѝ недостасува „сила“ за целосно да ги извршува своите владини и партиски должности и дека ѝ е потребно време да тагува.

– Нападите врз неа за време на нејзиниот период на жалење беа непристојни. Тоа е едноставно неприфатливо – изјави Клингбајл претходно.

Високи политичари од Христијанско-демократската унија – конзервативниот партнер во германската владејачка коалиција – го намалија значењето на оставката , изјавувајќи дека работата на Владата нема да биде засегната.

Поранешниот премиер на сојузната покраина Рајнланд-Пфалц, Александар Швајцер, исто така социјалдемократ, е предвидено да стане нов министер за труд, пренесе ДПА.