Репрезентативецот Костиќ нов одбојкар на кипарски Анагениси

Македонскиот одбојкарски репрезентативец Лука Костиќ во новата сезона ќе има нов интернационален предизвик, како играч на кипарскиот прволигаш Анагениси Дериниа.

Македонскиот одбојкар и кипарскиот клуб се обврзаа на едногодишна соработка.

Костиќ е четвртиот интернационалец во редовите на Анагениси Дериниа, а во дресот на новиот клуб ќе дебитира викендов, кога стартува кипарскиот шампионат.

„Со Дериниа се договоривме на едногодишна соработка. Веќе обработив неколку тренинзи со екипата и одлично сум прифатен од соиграчите. Има убава атмосфера за работа и убава енергија. Екипата е комбинација од млади и искусни играчи. Официјално сезоната стартува викендов и се надевам дека ќе биде успешна“, изјави Костиќ.

Македонскиот одбојкар претходно во кариерата настапуваше за Босна, Рибница, Марек Дупница, Будуќност, Џио Струмица, Гок Борец и Вардар.