Директорот на ФБИ Пател критикуван бидејќи подарил 3D-пиштоли кои се нелегални во Нов Зеланд

За време на официјалната посета на Нов Зеланд, директорот на Федералното биро за истраги (ФБИ) на САД, Каш Пател, им подарил на високи претставници на полицијата и разузнавачките служби пластични реплики на пиштоли изработени со 3D-печатач, кои според локалното законодавство се нелегални и требало да бидат уништени.

Пател во јули престојувал во Велингтон за отворањето на првиот самостоен канцелариски објект на ФБИ во Нов Зеланд. Тогаш, најмалку тројца високи службеници добиле вакви пиштоли како дел од официјални подароци.

Според новозеландските закони, пиштолите се строго регулирани и потребни се дополнителни дозволи, покрај вообичаената лиценца за поседување оружје. Не е прецизирано дали новозеландските претставници поседувале соодветни дозволи, ниту пак е јасно со какви документи Пател ги внел во земјата. Портпарол на ФБИ одби да го коментира случајот.

Началникот на полицијата, Ричард Чејмберс, изјави дека регулаторите процениле оти репликите можат да бидат модифицирани и функционализирани, поради што мора да бидат уништени.

Нов Зеланд нема силна култура на поседување оружје, а по масакрот во Крајстчрч во 2019 година, ставот кон оружјето стана уште понегативен. Во земјата поседувањето оружје се смета за привилегија, а не за право. Иако оружје е присутно во руралните средини за справување со штетници, криминал со огнено оружје е редок, а патролни полицајци обично не носат оружје на себе.