Гави повторно на операција на коленото

Фудбалерот на Барселона, Гави, ќе биде подложен на артроскопија на десното колено поради повреда на внатрешниот менискус, објави каталонскиот клуб.

Шпанскиот репрезентативец не играл од крајот на август, а интервенцијата е закажана за вторник, откако претходните третмани не дале резултати.

Барселона изјави дека Гави прво бил подложен на „конзервативен третман“, а потоа на „интензивни спортски стрес-тестови“, но дека е одлучено да се изврши мала операција за да се обезбеди целосно закрепнување и враќање на теренот.

Во ноември 2023 година, Гави претрпе сериозна повреда, руптура на предниот вкрстен лигамент и оштетување на менискусот на истото колено, поради што беше надвор од игра една година.

Барселона не прецизираше колку долго ќе трае новото закрепнување, но потсетува дека претходната операција на фудбалерот го држеше надвор од теренот 12 месеци.

Младиот играч од средниот ред се приклучува на растечкиот список на повреди за шпанскиот шампион, на кој веќе се наоѓаат Фермин Лопес, Ламин Јамал, Алехандро Балде и голманот Марк-Андре тер Штеген.