Врз австралиска парламентарка налета автомобил, Албанезе изјави дека нападот бил намерно извршен

Австралискиот премиер Ентони Албанезе изјави дека властите веруваат дека сообраќајната несреќа со независната пратеничка Хелен Хејнс е резултат на намерен напад. Хејнс беше удрена денеска од автомобил пред нејзината канцеларија во Вангарата, во австралиската држава Викторија. Мотивот сè уште не е познат, а австралиската антитерористичка единица се приклучила на истрагата.

Во интервју за локални медиуми, Албанезе предупреди на зголемување на политичките тензии и заканите кон јавните службеници, поради што на политичарите им е сè повеќе потребна дополнителна заштита и го ограничуваат своето движење.

„Тензиите несомнено се зголемија, не само овде во Австралија, туку и на меѓународно ниво“, рече премиерот, нарекувајќи го загрижувачки тоа што политичарите се соочуваат со зголемени безбедносни ризици.

Министерот за внатрешни работи Тони Бурк, кој беше заедно со премиерот на прес конференција, предупреди дека годишниот број на пријави за вознемирување и закани кон високи владини претставници се зголемил од 951 на 1.067.

Хејнс беше повредена околу 15:35 часот по локално време. Таа беше удрена од автомобил по што минувачите го задржаа возачот додека не пристигна полицијата.

Маж (43) од Таравинги беше уапсен, а полицијата пронајде нож во неговото возило. Пратеничката се здоби со повреди и се разгледува нејзин превоз во Мелбурн за понатамошно лекување. Полицијата засега го третира случајот како изолиран инцидент.