НБА: Мемфис триумфираше во Лондон, навивач го попречи изведувањето на американската химна

Кошаркарите на Мемфис го совладаа Орландо со 126-109 во натпревар од регуларната сезона во НБА лигата, одигран во неделата на лондонската О2 Арена, а дуелот го обележа инцидент кога навивач го попречи изведувањето на американската национална химна.

Американската химна, која е составен дел од сите натпревари во НБА, ја изведе пејачката Ванеса Вилијамс, а за време на нејзиниот настап еден гледач извика „Leave Greenland alone!“ (Оставете го Гренланд на мира), што предизвика срамежлив аплауз од трибините.

Вилијамс го заврши својот настап без прекин, а потоа првиот натпревар од регуларната сезона на НБА во Лондон од 2019 година беше одигран пред 18.424 гледачи.

Џа Морант го предводеше Мемфис до убедлива победа со 24 поени и 13 асистенции по враќањето од повреда на глуждот.

НБА го проширува своето влијание во Европа, каде што би можела да лансира нова лига во соработка со ФИБА Европа почнувајќи од сезоната 2027/2028. Засега е извесно дека ќе продолжи практиката на играње натпревари од регуларната сезона на Стариот континент. Манчестер ќе биде домаќин во 2027 година, а Париз и Берлин ќе бидат домаќини во 2028 година.