Во Боливија неколку стотици луѓе протестираа поради изборот на новиот претседател

Неколку стотици луѓе синоќа во Ла Паз протестираа против изборот на новиот претседател од десниот центар Родриго Паз, осудувајќи ги наводните нерегуларности за време на изборите и барајќи ревизија.

Паз, 58-годишен економист, победи во вториот круг од изборите во неделата со 54,5 отсто од гласовите против својот противник, поранешниот десничарски претседател од 2001 до 2002 година, Хорхе Кирога.

Кирога го призна резултатот и му честиташе на својот ривал, најавувајќи дека во наредните денови ќе биде проверена евиденцијата за гласање по обвинувањата за нерегуларности.

Такви тврдења кружат на социјалните мрежи, но засега нема докази за тие нерегуларности.

Победата на Родриго Паз означи крај на 20 години левичарска влада во Боливија.

Демонстрантите извикуваа „измама“ и се обидоа да се соберат на плоштадот каде што се наоѓаат претседателството и парламентот. Полицијата ги растера, но нема пријавени инциденти. Потоа се упатија кон Врховниот изборен суд, телото кое ги објави изборните резултати во неделата.

Врховниот изборен суд вчера ја негираше секоја можност за нерегуларности, наведувајќи дека „зборот измама треба да биде забранет во Боливија“.

Боливија е земја со една од најголемите резерви на литиум во светот, а се наоѓа во најтешката економска криза во последните четири децении.