Израелската армија го зголеми степенот на готовност пред изборите на 27 октомври

Израелската армија денеска соопшти дека го зголемила степенот на готовност поради безбедносни загрижености во пресрет на парламентарните избори закажани за 27 октомври, при што од четврток војниците повеќе нема да имаат дозвола да ги напуштаат своите единици, а дополнителни сили ќе бидат распоредени на окупираниот Западен Брег.

Израелските одбранбени сили (ИДФ) соопштија дека целта на мерките е да се обезбеди изборите да се одржат според планираното и во безбедни услови. Според израелската телевизија Н12, мерките се преземаат поради загриженоста од можни напади што би можеле да бидат искористени за влијание врз изборите, додека зголемувањето на бројот на војници на Западниот Брег доаѓа и во услови на пораст на нападите од страна на радикални израелски доселеници.

Началникот на Генералштабот на израелската армија, Ејал Замир, одржа состанок со високи воени офицери на кој се разговарало за безбедносната состојба на различните фронтови. Минатата недела, при посетата на Централната команда, Замир предупреди на зголемен ризик од ескалација, наведувајќи дека пристигнале бројни предупредувања од различни фронтови.

Десничарскиот весник „Макор Ришон“ неодамна објави дека најголемата загриженост се однесува на можни напади на палестинската исламистичка организација Хамас врз израелски војници во Појасот Газа.

Во меѓувреме, израелскиот премиер Бенјамин Нетанјаху упати јасно предупредување до непријателите на Израел за време на посетата на воздухопловна база.

„Подготвени сме, решителни сме и имаме капацитет да ги нападнеме нашите непријатели веднаш штом тоа ќе биде потребно“, изјави Нетанјаху.