Црна Гора: Само 0,63 отсто од случаите со познат сторител завршиле со застареност на кривичното гонење

Врховното државно обвинителство (ВДТ) на Црна Гора со анализа на податоците за речиси шест години (од 1 јануари 2020 до 1 ноември 2025 година) утврдило дека застареноста на кривичното гонење во предмети формирани против познати сторители е исклучително ретка.

Од вкупно 57.756 формирани предмети по поднесени пријави против познати сторители, застареноста на кривичното гонење е евидентирана во само 0,63 отсто од случаите, соопшти Обвинителството.

Во 339 предмети (0,59% од вкупниот број) против познати сторители, застареноста на кривичното гонење настапила пред самото поднесување на кривичната пријава до обвинителството. Само во 23 предмети (0,04% од вкупниот број) против познати сторители, застареноста на кривичното гонење настапила по поднесувањето на кривичната пријава до обвинителството.

Овие податоци, како што наведуваат, потврдуваат дека кога сторителот е идентификуван, застареноста на кривичното гонење е статистички занемарлива, а обвинителствата во најголем број случаи постапуваат навремено и ефикасно.

ВДТ во 2025 година спроведува надзор над работата на основните државни обвинителства со цел да ги провери околностите дали е оправдано и поради кои околности настапува застареноста на кривичното гонење, а особено во 23-те предмети каде застареноста настапила по поднесувањето на пријавата.

Со увид во предметите е утврдено дека застареноста настапила од оправдани причини на кои државните обвинители не можеле да влијаат и покрај преземањето законски дејствија, освен во два предмета, поради што е покрената една дисциплинска постапка против државен обвинител.

Во предмети формирани против непознати сторители (13.861 предмет формиран во период од 10 години), застареноста е евидентирана во 41% од овие предмети (5.794 предмети).

Од обвинителството истакнуваат дека причината за застареноста е неможноста на полицијата да ги идентификува сторителите во законските рокови, поради што, со протекот на времето во кое може да се преземе кривично гонење, настапила застареност и неможност за понатамошно кривично гонење.

Заради унапредување на ефикасноста на постапувањето, во декември минатата година врховниот државен обвинител донесе Упатство за постапување на државните обвинителства во предмети против непознати сторители, кое има за цел дополнително да ја стандардизира и забрза работата на овие предмети.