Литванија ќе соборува шверцерски балони од Белорусија

Литванската премиерка Инга Ругиниене изјави дека нејзината земја ќе почне да соборува шверцерски балони кои ја минуваат државната граница од Белорусија, што во повеќе наврати го наруши воздушниот сообраќај на балтичката земја.

Литванија, членка на НАТО, минатата недела четири пати го затвори аеродромот во Вилнус откако балони влегоа во нејзиниот воздушен простор. Секој пат привремено ги затвораше и премините на границата со Белорусија како одговор на овие инциденти.

Литванија соопшти дека балоните ги испраќаат шверцери за превоз на цигари, но го обвини и белорускиот претседател Александар Лукашенко, близок сојузник на рускиот претседател Владимир Путин, дека не ја прекинал таквата практика.

Ругиниене ги нарече инцидентите „хибридни напади“ и најави дека премините на границата со Белорусија ќе бидат затворени за сите освен за дипломати и државјани на земјите членки на Европската унија кои ја напуштаат соседната земја.

– Денеска решивме да ги преземеме најстрогите мерки, нема друг начин, рече Ругиниене на прес-конференција, додавајќи дека нејзината влада би можела да разговара и за повикување на Членот 4 од НАТО, кој им овозможува на членките да побараат консултации за безбедносни проблеми.