Мајкл Јанг номиниран за амбасадор на САД во Србија

Претседателот на Соединетите Американски Држави, Доналд Трамп, го номинираше Мајкл Јанг од Јута за амбасадор на оваа држава во Србија, соопшти Белата куќа. Со декретот потпишан вчера беа номинирани и амбасадори за Босна и Херцеговина, Црна Гора и Бугарија. Меѓу новите назначувања нема кандидат за амбасадор во Приштина.

Како што соопшти Белата куќа, вчера беа номинирани амбасадори во Ел Салвадор, Азербејџан, Камбоџа, Екваторијална Гвинеја, Молдавија, Индонезија, Република Тринидад и Тобаго, Парагвај, Колумбија, Литванија, Египет, Бразил, Еквадор, Гамбија, Сиера Леоне и Кенија.

Беа истакнати и амбасадорите за регионот.

Трамп го номинираше Роналд Џонсон од Масачусетс за амбасадор во Босна и Херцеговина, а Питер Мекој од Јужна Каролина беше номиниран за амбасадор во Црна Гора.

Амбасадорот за Бугарија исто така беше номиниран, а во прашање е Даглас Холдер, од Флорида.

Трамп го предложи Мајкл Јанг, од Јута, за амбасадор во Белград.

Позицијата амбасадор на САД во Србија е празна од јануари минатата година, кога претходниот амбасадор, Кристофер Хил, ја напушти позицијата.

Меѓу номинациите објавени од Белата куќа, сè уште нема кандидат за амбасадор на САД во Косово.

Позицијата амбасадор во Приштина ја извршуваше Џеф Ховение до крајот на 2024 година, по што ја напушти функцијата и се пензионираше, а моментално позицијата вршител на должноста амбасадор во американската амбасада во Приштина ја извршува Ану Пратипати.

Претседателските номинации за амбасадори, според постапката во САД, одат до Сенатскиот комитет за надворешни работи, кој ги разгледува и гласа за кандидатите.