Кошта во ЕП: Европа е обединета во заштитата на своите интереси и вредности

Пораката на европските лидери по важниот и плоден состанок на Европскиот совет е јасна – Европа ја зајакнува својата конкурентност и е обединета во одбраната на своите интереси и вредности, изјави претседателот на Европскиот совет, Антонио Кошта, во изјава до Европскиот парламент по заклучоците од состанокот на Европскиот совет од 15 и 16 октомври.

„Нашите дебати се фокусираа на четири главни приоритети – конкурентност, претстојната финансиска рамка на унијата, Украина и миграциската политика“, рече Коста.

Според него, ЕУ постигна напредок во областа на конкурентноста, но сега треба да ја забрза работата за да ги постигне целите што си ги поставила. 

„За таа цел, ќе организирам состанок во февруари за да разговарам со лидерите за напредокот на работата за конкурентност и одбрана“, рече Коста.

„Цената на енергијата е во срцето на овие напори. Домаќинствата и компаниите ја плаќаат цената на војната што се води далеку од нашите граници“, рече претседателот на Европскиот совет.

Тој додаде дека војната на Блискиот Исток бара итна акција за намалување на притисокот врз домаќинствата и компаниите, а Европската комисија предложила одложување на регулативите за метан, стратегија за европските рафинерии и посилна координација на набавките на енергија. Покрај тоа, Г7 планира да координира ослободување на седум милијарди барели нафта и дизел.