Сирија и Ирак запленија 2,5 милиона таблети „каптагон“

Службите за борба против дрогата на Сирија и Ирак запленија 2,5 милиона таблети стимуланс „каптагон“ за време на операција спроведена во двете земји, соопшти сириското Министерство за внатрешни работи.

Две лица беа уапсени во Сирија во централниот регион Хомс и во главниот град Дамаск, како и уште едно во Ирак, соопшти Министерството.

„Каптагон“, моќен стимуланс базиран на синтетички амфетамин, стана главен извозен производ на Сирија за време на граѓанската војна, која избувна во 2011 година, а профитот од трговијата со дрога обезбеди извор на финансирање за владата на соборениот претседател Башар ал-Асад.

Откако Асад беше соборен, новата сириска влада заплени многу пратки „каптагон“ вклучувајќи една што содржеше речиси 11 милиони таблети „каптагон“ во октомври минатата година. Сепак, соседните земји на Сирија продолжуваат да пријавуваат запленување големи пратки.