САД распоредуваат носач на авиони во Блиски Исток

Пентагон го прераспоредува носачот на авиони „УСС Абрахам Линколн“ од Јужното Кинеско Море на Блискиот Исток. Поморската формација на носачот на авиони вклучува и други бродови и најмалку една офанзивна подморница. Прераспоредувањето ќе трае речиси една недела, објави „Њуз нејшн“ (NewsNation).

Маневарот се случува поради протестите во Иран и дебатата дали САД ќе им помогне на демонстрантите, како што најави американскиот претседател Доналд Трамп.

Во меѓувреме, „Волстрит џурнал“ (The Wall Street Journal) објави дека сегашни и поранешни американски воени претставници предупредуваат дека одлуката на Трамп за воено засилување на Карибите, донесена минатата есен како дел од кампањата за притисок врз тогашниот венецуелски претседател Николас Мадуро, сега ги ограничува опциите на Вашингтон во случај на конфликт со Техеран поради протестите.

Пентагон околу Карибите има распоредено 12 воени брода, а на Блискиот Исток – шест.

Трамп во октомври минатата година го прераспореди носачот на авиони „УСС Џералд Р. Форд“ од Средоземното во Карипското Море, така што сега не располага со ударна група на носачи на авиони на Блискиот Исток или во Европа.

Според воените експерти, тоа не значи дека ако Трамп нареди напад врз Иран, американската армија не може да ја изврши. Евентуален напад би се извршил со ракетите „томахавк“, кои би биле лансирани од бродовите разорувачи стациониран на Блискиот Исток, би се ангажирале и борбените авиони, кои се во регионот, како и авиони бомбардери, кои може да долетаат од базите во САД до Иран.

Тие наведоа и дека САД за воздушни напади би можеле да ги користат базите во Јордан, Саудиска Арабија, Катар и во Обединетите Арапски Емирати, но и авиобазите во Европа – РАФ Лејкнхет во Велика Британија, Авијано во Италија и Спангдалем во Германија.

Воените капацитети на Иран се значително намалени по минатогодишните израелски и американски напади. При израелските воздушни напади во 2024 година, според „Волстрит џурнал“, е уништена иранската стратешката воздушна одбрана и сериозно се оштетени производствените капацитети за ракети.