Косовската полиција претресува простории каде што се вршат нелегални естетски интервенции

Основното обвинителство во Приштина објави дека спроведува сеопфатна операција во регионот на Приштина, заедно со косовската полиција, со цел борба против нелегалните услуги за ботокс.

Постои основано сомнение дека естетски услуги биле обезбедени во 15 простории со употреба на медицинскиот производ ботокс, иако, според законот, ваквите услуги може да ги обезбедува само сертифициран персонал.

Како што е најавено, операцијата има за цел да се запленат докази што би потврдиле „злоупотреба на службена должност“, „нелегално вршење медицински активности“ и „нелегална трговија“.

„Според официјалните податоци, во Република Косово нема лиценциран економски оператор за увоз на овој медицински производ и, како таков, овој производ се третира како нелегален во овие околности“, се вели во соопштението.