Муртезани за можното заминување на амбасадорската позиција во Брисел: Во моментов нема конкретни решенија кој на која позиција ќе биде

Министерот за европски прашања Орхан Муртезани денеска изјави дека во моментов се работи на модалитетите за пополнување на испразнетите позиции во Владата и оти се уште нема конкретни решенија, кој на која позиција ќе биде, па така и во однос на тоа дали тој ќе замине на амбасадорката позиција во Брисел.

-Во рамки на коалицијата ВРЕДИ се уште се разговара за модалитетите на реконструкцијата. Се уште нема финален договор како ќе изгледа реконстуркцијата, кој ќе замине, а кој ќе дојде на функцијата и дали некој ќе замине надвор од земјата. Во моментов можа да потврдам дека се работи на модалитетите и дека нема конкретно решение, истакна Муртезани, одговарајќи на новинарско прашање на заедничката прес-конференција со министерката за европски прашања на Шведска Јесика Розенкранц.

Извори од ВРЕДИ за МИА завчера посочија дека во коалицијата се усогласени новите министерски позиции, по изборот на Изет Меџити за градоначалник во Чаир. Според извори во коалицијата Беким Сали ќе биде кандидат за функцијата прв вицепремиер и министер за евроинтеграции, Мухамед Хоџа за ресорот животна средина, додека Башким Бакиу ќе биде предложен за нов министер за здравство на местото на Азир Алиу. Алиу, пак, треба да ја преземе директорската позиција во Агенцијата за електронски комуникации. Актуелниот министер за евроинтеграции Орхан Муртезани е номиниран за амбасадор во Брисел.

Премиерот Христијан Мицкоски завчера во изјава за медиумите кажа дека очекува имињата на новите функционери, ВРЕДИ до него да ги достави в понеделник, откако ќе бидат искристализирани, но, дополни дека тоа се оние имиња, кои горе долу циркулираат во јавноста.

• Нема да има нови ресори, ВРЕДИ нема да добие плус човек, еден ист човек ќе биде вицепремиер и министер, изјави Мицкоски.