Варшава и Берлин скептични околу извештаите за американскиот мировен план за Украина

Полскиот министер за надворешни работи, Радослав Шикорски, денеска изрази противење на новиот мировен план за Украина, за кој се известува дека е изготвен од американски официјални лица, додека висок германски функционер го опиша како „неприфатлив“, пренесе ДПА.

Се верува дека нацртот на Вашингтон, за кој првпат јави Фајненшл Тајмс, вклучува широки отстапки за Москва, повикувајќи ја Украина да ја преполови големината на својата армија и да ги отстапи провинциите на истокот окупирани од Русија, вклучувајќи ги Доњецк и Луганск.

Планот, наводно, исто така предвидува Русија да добие контрола врз областите што не успеала да ги заземе во речиси четиригодишната војна.

Новинскиот портал Аксиос објави дека предлогот бил договорен од специјалниот пратеник на американскиот претседател Доналд Трамп, Стив Виткоф, и високиот руски функционер Кирил Дмитриев.

Се вели дека Киев бил информиран за новиот план, додека извори во Брисел соопштија дека Европската Унија не била информирана.

Пред состанокот со неговите колеги од ЕУ во Брисел, Шикорски го критикуваше планот, велејќи дека не треба да се ослабнува способноста на жртвата да се брани, туку способноста на напаѓачот да напаѓа.

Иако Полска ги поддржува сите напори за ставање крај на борбите во Украина, европската безбедност во голема мера зависи од исходот на секој мировен договор, рече тој.

Затоа, Варшава бара европско учество во мировниот процес, додаде тој.

Предлогот беше лошо прифатен и во Берлин, каде што пратеникот Торстен Фрај, шеф на кабинетот на канцеларот Фридрих Мерц, рече дека повлекување на Украина од територија што сè уште ја контролира би било „неприфатлив исход“.

Извештаите за новиот мировен план доаѓаат во време кога украинските сили се соочуваат со голем притисок околу источниот град Покровск и кратко откако кредибилитетот на украинскиот претседател Володимир Зеленски беше погоден од голем владин корупциски скандал.